Finansije i Osiguranje - Makedonija

Ново задолжување од над 81 милион евра

Од денес на Берзата котираат две нови обврзници вредни 24,2 и 57,3 милиони евра. Едната е петгодишна, другата 15-годишна.

„Ве известуваме дека согласно поднесено барање од страна на Министерството за финансии на Република Северна Македонија за котација на државни обврзници, почнувајќи од 08.03.2024 година на Официјалниот пазар на подсегментот Берзанска котација ќе бидат примени на котација државните обврзници со следните карактеристики…“, пишува на почетокот од информацијата на Македонска берза.
И двете државни обврзници се без девизна клаузула, а издадени се вчера – 7 март.

Вредност на првата емисија е 1.491.000.000 денари или речиси 24,2 милиони евра. Издадени се 149.100 хартии од вредност од овој вид, со номинална вредност за обврзница од 10.000 денари. Носи каматна стапка од 4,2 проценти, а датум на достасување е седми март 2029 години.

Втората емисија е вредна 3.531.490.000 денари, односно 57,3 милиони евра. Издадени се 353.149 обврзници, со номинална цена, исто така од десет илјади денари. Овие хартии од вредност се со повисока стапка – 5,6 проценти. Доспеваат на седми март 2039 година.